Corona Air Greenlandimut amigartoortitsisoq
Air Greenland 2021-mi ukiup qiteqqunnerani, suli akileraarnani, 14,1 millionit koruuninik amigartooruteqarpoq.
Taama amigartoorneq coronamik ajornartoornermik peqquteqarpoq, naatsorsuutigineqartumilli sunnerneqarnerulluni.
Air Greenlandip 2021-mi ukiup qiteqqunnerani naatsorsuutaani tamanna atuarneqarsinnaavoq.
Millionilikkaanik amigartoorfiugaluartoq taamaattoq pitsanngoriarfeqarpoq.Ukiummi siulianut sanilliullugu 16,4 millionit koruuninik pitsanngoriaataavoq, taamani 30,5 millionit koruuninik amigartoormat.
Corona suli kingunerlutsitsisoq
2020 aallartimmat corona ukioq mannamut kingunerlutsitsinissaa Air Greenlandip naatsorsuutigereersimavaa. Ukiorli aallartilluanngitsoq naatsorsuutigineqartunit kingunerlutsitsilereersoq piginneqatigiiffimmiit malugineqarpoq.
Takornarianik tikittoqanngilaq, angallannerlu sakkortuumik piumasaqaatitaqareertoq, unitsilluinnarneqartarpoq.
- Ukiup affaa nunarsuarmi unammillernarsimaqaaq, nunarsuaq tamakkerlugu tunillaassuunneq angallannissamullu killilersuuteqarmat naatsorsuutigisamiit ajoraluartumik angallattoqarpianngilaq – ingammik imarpik qulaallugu angallattukilluni, pisortaq Jacob Nitter oqarpoq.
AAMMA ATUARUK Nunatsinni silaannakkut angallanneq matuneqarmat: Soorlu naakkut tillutsilluni
- Aningasartuutinut allanillu ileqqaarfigisinnaasatsinni aningaasartuutikillisarsimavugut, malitsigisaanillu angallannissamut akitsuisimalluta. Ukiassamulli angallannerulertoqarlunilu akiuussusersuinerup malitsigisaanik killilersuutigineqartut qasukkarneqarnissaat neriuuteqarpugut, taanna oqarpoq.
Ukiumut tamarmut sinneqartuussangasut
Naak coronamik ajornartoorneq Air Greenlandip siuttuisa naatsorsuutigisaannit ilungersornarnerugaluartoq, ukiup naanerani naatsorsuutit 60 - 80 millionit koruuninik sinneqartoornissaq piviusorsiortoq, aqutsisut isumaqarput.
- 2021-mut angusassatut naatsorsuutit ilimagisamit annertunerungaarnerat nunatta ammaakkiartuaarneranik, angalasut amerliartornerinik aammalu akiuussusersuinerup nassataanik suli angalasoqarnerulerneranik peqquteqarpq - ingammik Atlantikoq qulaallugu angallannermi, ukiup affaanut nalunarusiami allapput.
Aamma ileqqaarutit arlallit naatsorsuutini takuneqarsinnaalerumaartut, Air Greenlandimi naatsorsuutigaat.
