CopyDan isumaqatigiissusiorpoq
Danmarkimi Tusagassiortut Kattuffiata siulittaasua, Mogens Blicher Bjerregaard Copydan sinnerlugu ataatsimeeqataavoq.
- Kalaallit Nunaanni atuarfiit atuakkaniit, atuagassianiit aviisiniillu assilisanik atuisarput tamannalu pillugu akiliisarnissaminnut isumaqatigiissut naapertorlugu akiliutigisartagaat Copydanimiit agguarnissaat isumagineqartarpoq, Mogens Blicher Bjerregaard nassuiaavoq.
Kalaallit Nunaanni ilinniartoqarfiit ukioq 2000-imili Copydanimik isumaqatigiissusiormata ukiumut 500.000 koruunit 1 miliuuni koruunillu akornanni akiliutigineqartarmata, ullumikkut 4 miliuuni koruunit sinnilaarlugit uninngasuutigineqarput. Tamannali isuumaqanngilaq kalaallit atuakkiortut tassa aningaasarsitinneqaannassasut.
- Ukiut tallimat arfinillilluunniit kingumut uterluta misissorsinnaanngilagut atuakkiortut kikkut allagaat, erinniortulluunniit kikkut nuutiliaat assilineqarlutik atorneqarsimanersut. Isumaqatigiissusiortariaqarpugut atuakkiortut, tusagassiortut taalliortut erinniortullu, illuatungaannilu naqiteriviit aviisillu sumut aningaasanik uninngasuutitanik siunertanut aalajangersimasunut atugassaminnik qinnuteqarsinnaassanersut. Siunertat aalajangersimasut tapiiffigineqarsinnaasut tassaapput; ilisimatusarnerit, ilinniaqqinnerit, ataatsimeersuarnerit kulturikkullu suliniutit, Mogens Blicher Bjerregaard oqarpoq.
Kalaallit Nunaanni tapiisarnissamut ataatsimiititaliap piffissami aggersumi aningaasanik qinnuteqaatit qanoq suliarineqartarnissaat aalajangersaavigissavaat.
