Copenhagen Pridemi kalaallit immikkut peqataapput
Qalipaatit neriusaatut isikkullit takussaapput, Københavnemi suiaaqatigiit ukiumoortumik ingerlaaqatigiinneranni Copenhagen Pridemi arfininngornermi ualikkut pisumi.
Ukiormanna ingerlaaqatigiittoqarnerani aatsaat taama amerlatigisut peqataapput.
Inuit 40.000-it missaannik amerlatigisut biilit lastiinut 180-inut ikillutik Københavnep aqquserngisigut ingerlaaqatigiipput, atoqatigiinnikkut ikinnerussuteqartut assigiinngissuseq pingaartillugu suaarutigimmassuk.
Kalaallit Illutaat Københavneimiittoq, pisortatigoortumik siullerpaamik ingerlaaqatigiinnermut Copenhagen Pridemut peqataatitaqarpoq taaguuteqarluni Gay Greenland Sipineq
- 20-ulluta aallartippugut ingerlaaqatigiinnermilu kalaallit ilanngutillattaarput, naggataatigullu 30-ulluta ingerlaaqatigiippugut, ingerlaaqatigiinnermut Copenhagen Pridemut Gay Greenlandimut peqataasoq aaqqissuusseqataasorlu Nukannguaq Mathiesen Fontain taama oqarpoq.
AAMMA ATUARUK Kalaallit Illuutaat Copenhagen Pridemi peqataarngaalersoq
Kalaallit ingerlaaqatigiinnermut peqataasut kalaallit erfalasuannik tigumiarput aappaluttumik tujuuluaraqarlutik assatillu qernertumik qalipassimallugit. Kalaallit immikkut ingerlaaqatigiinnerat alutorineqarpoq nuannarineqarlunilu,
- Kalaallit ingerlaaqatigiittut erfalasulisaartullu takugaangamikkit nilliasarput, qallunaatut tuluttullu Kalaallit Nunaat taasarlugu, ingerlaaqatigiittullu tapersersorlugit, ingerlaaqatigiittunullu akuliuttarlutik Nukannguaq Mathiesen Fontain taama oqarpoq.
Siorna ingerlaaqatigiittoqarmat, inuit 25.000-it missaanniittut peqataapput ingerlaaqatigiittunullu malinnaasut 300.000-it missaanniillutik.
Ingerlaaqatigiittut qiimmassimaarput qitittarlutillu, Københavnellu ilaani Frederiksberg Rådhusiata eqqaani ullup qeqqata missaani aallartipput 3,3 kilometerisullu isorartortussuseqartoq ingerlaarfigereerlugu Københavnip Rådhusianut Rådhuspladsimut pingasut missaanni apuupput, tassani tusarnaartitsisoqarput qitittunillu isiginnaartitsisoqarluni.
