Copenhagen Cookingeqalerpat kaffisortitsilersut

Kalaallit Illuutaat kaffisortitsissaaq kaagiliornermillu unammisitsissalluni.

- Københavnimi eqqaanilu sumiiffinni sapinngisamik amerlanerpaani Kalaallit Nunaata erfalasua saqqumilaartikkusupparput. Taamaammat festivalit anginerit peqataaffigisinnaasagut tamaasa peqataaffiginiartarpagut, ukiormannalu Copenhagen Cookingeqarnerani peqataasinnaanerput nuannaarutigeqaarput, Kalaallit Illuutaanni Københavnimiittumi pisortaq, Leise Johnsen, taama oqarpoq.

Kaagiliornermik unammisitsinermi peqataasut 20-t tungaannoortut namminneq kaagiliatik unammissutigissavaat, taakkulu mamassusaat qanorlu suliarineqarsimaneri naliliisartunit Nickie Isaksenimit Isaksen Designimeersumit, Malene Fiskerimit Conditori La Glacemeersumit aammalu Karola Pikemit Kalaallit Illuutaanneersumit nalilersorneqassapput.

Aaqqissuussineq arfininngorpat aggustip 29-ani nal. 13-17 pissaaq, aammalu Copenhagen Cookingip ilitsersuutaanut  ”Verdensmanden”-imut ilanngunneqarsimalluni.

Isissutissat Billettomi, Kalaallit Illuutaanni isilernermilu pisiarineqarsinnaapput.