COP16 isumalluarpaluttumik aallartippoq

Silap pissusaata allanngoriartornera pillugu Naalagaaffiit Peqatigiit aaqqissuussaannik ataatsimeersuarneq, COP16 ippassaq ammarmat, Mexicomi præsidenti, Felipe Calderón, oqalugiarnermini neriulluarpaluttumik isumalluarpasissumillu nipeqarpoq.
novembarip 30-at 2010 06:01

- Silap pissusaata allanngorneri nunarsuarmiut pilersitaraat, nunarsuarmiullu kisimik unitsissinnaavaat, Calderón oqarpoq.

Pinngortitap minguitsuutinnissaa ataavartinneqarnissaalu, aamma piitsuunerup akiorniarneqarnissaa, nunarsuarmiunut kaammattuutigaa. Nunarsuarmi silap kiatsikkiartornera akiorniarneqaraluartoq piitsut aamma atugarissaarnerulernissaat anguneqarsinnaavoq, præsidenti erseqqissaavoq.

Silap pissusaa pillugu Danmarkimi ministerip, Lykke Friisip, ammaanermi oqalugiarami eqqaasitsissutigaa, silap pissusaata allanngoriartorneri akiornianngikkutsigik piviusuusut ilisimatusarnikkut akerlilerneqarsinnaanngitsut, iliuuseqanngikkuttalu taamaaginnassasut.

Kalaallit Nunaanni sermersuaq ukiuni tusindtilippassuarni Qaasuitsup Ulloriaata ataaniippoq. Sapaatip-akunnerinilli marlunnik siusinnerusukkut maanna upernartalerpoq, sermerlu aakkiartulereerluni. Maldiverimiut sapaatip-akunnerisa marluk matuma siorna tikeraarpakka, silallu pissusaata allanngoriartornera unitsinngikkutsigu, taakku nunaat piujunnaassaaq, Lykke Friis oqarpoq.

Nunarsuatsinni nunat ulorianartorsiornerpaat Nunanit Killernit tapersersorneqaqqullugit Lykke Friisip aamma kaammattuutigaa.