COP16 aallartippoq

Naalagaaffiit Peqatigiit silap pissusaa pillugu ataatsimeersuartitsinerisa 16-issaat, COP16, Mexicomi ullumi aallartippoq.
Allattoq Elisa Isaksen
novembarip 29-at 2010 07:15

Kisianni ataatsimeersuarnerup inatsisiliornikkut pituttuisumik isumaqatigiissuteqarfiunissaa ilimagineqarpallaanngilaq.

2010 nunarsuatsinni ukiuni kiannerpaatut uuttorneqartoq, ilisimatuunit nalunaarutigineqarpoq.

COP15-imi Københavnimi siorna ataatsimeersuartoqarmat, nunarsuatta agguaqatigiissillugu 2 gradinik taamaallaat kiannerulernissaa nunat tamalaat akornanni pisussaaffiliinngitsumik isumaqatigiissutigineqarpoq.

Isumaqatigiissut nunanit 140-nit atsioqataaffigineqarpoq.

Taamaattorli nunat CO2-mik mingutsitsinerisa killilerniarnerini piollugit kisitsisitaliisoqarsinnaasimanngilaq. Maannamullu neriorsuutit naapertorlugit 3 gradinik kiannerulissangatinneqarluni.

Kyotomi isumaqatigiissut aappaagu naasussaavoq, tamannalu nallertinnagu CO2-mik mingutsitsinermut killiliisumik pisussaaffiliisumik isumaqatigiissuteqarniartussaagaluarpoq.

Naalakkersuisut siulittaasuat Kuupik Kleist Inatsisartunillu peqataatitat marluk sapaatip akunnerata tulliani COP 16-imut peqataajartorlutik aallassapput.