Contador nukkassaatitorsimasutut pasineqalerpoq

Taassuma qularutiginngilaa, Spaniamiut bøfiliaannit nerisaminit nukkassaatitalimmit tamanna pissarsiarisimassallugu. Tassa tamannaavoq pasineqarnerminut nassuiaatiginiagaa, Ritzauimi taama allaaserinnittoqarpoq.

- Tamanna ilumoorsimasuuppat, tamanna sapaatip akunnera ataaseq qaangiutiinnartoq saqqummiunneqassagaluarpoq, Contador oqarpoq innersuussutigalugulu misiligutitut tiguneqartoq aasaq Tour de Francertoqarnerani ullut qasuersaarfiit aappaanni, tassa juunip 21-anni pimmat.

Sikkilertartut nunani tamalaani kattuffiata UCI-p, nalunaaruteqannginnermini misiligut marloriarlugu misissoqqissaarpaa.

UCI tusagassiuutinut nalunaarummi allappoq, misiligutini Contadorimeersuni clenbuterol annikitsuararsuaq naammattoorneqarsimasoq. Taamaattumillu misissuinertik suli naammassivinneqanngitsoq.

Contador nukkassaatinik atuisimasutut pisuutinneqassaguni, ukiuni marlunni unammeqataasinnaajunnaarsinneqarsinnaavoq.