Contador Bjarne Riisimut sikkilertunngorpoq

Tour de Francemi arlaleriarluni ajugaanikoq, Alberto Contador, Bjarne Riisip sikkilertartuini aqutsisunngorpoq.
aggustip 03-at 2010 11:47

Bjarne Riisip sikkilinik unammisartui unammersuarnissami tulliuttuni Team Saxo Bank-SunGardimik taaguuteqartussat ukioq manna Tour de Francemi pissartanngortumit Spaniamiumit Alberto Contadorimut siuttoqassapput.

Amerikamiit aningaasaliiniat nutaat SunGard qaammat kingulleq Tour de Franceqarnerani tusarliunneqarpoq, taamaammallu siornatigut aningaasaliisooreersoq qallunaat bankiat Saxo Bank aningaasaliisooqqinniarmat nuannajallaataavoq.

Ullaap tungaa Saxo bankimut kiisalu Alberto Contadorimut ukiunut marlunnut suleqatigiinnissamik isumaqatigiissut Hotel Skt. Petrimi Københavnimiittumi atsiorneqarput.

Aningaasarpassuillu Riis periarfissippaat ukiup tulliani Tour de Francemi sikkilertartuminik ajugaatitaqarniarnissaa.

- Contador holditsinnut nukittorsaataassaqaaq, Riis DR-imut oqarpoq.

Taanna Contador peqatigalugu Tour de Francemi, Giro d'Italiami, Vuelta a Espanamilu pingasoriaammik pissartanngorniarniarlutik pilersaarpoq.

Alberto Contador Frankrigimi unammisoqarnerani peqataanini pissutigalugu Københavnimi tusagassiortunik katersortitsisoqarmat ilaanngilaq, tusagassiutinulli nalunaarummi ima oqarpoq:

- Uanga isumaqarpunga periarfissaq pitsaanerpaaq qinersimallugu, qularinngilluinnarpara aappaagumut Riis holdimik nukittuumik pilersitsissasoq, Alberto Contador manna tikillugu pingasoriarluni Tour de Francemi pissartanngortarsimasoq oqarpoq.