Contador ajugaassagunarpoq
Ataasiakkaarluni sukkaniunneq aallartitsinnagu Alberto Contador sukkaniuttuni siuttuuvoq, Andy Schleckimit 8 sekuntiinnarnik siuarsimalluni.
Ingerlangaatsiareersut Schleckip Spaniamiu taanna siuttusoq unammillerluarsinnaagaa ilimanarsigaluarpoq.
Kisianni Schleck qasulersutut misinnarsimmat, ataasiakkaarluni aallartarluni sukkaniunneq naammassimmat Alberto Contadorip siuarsimanini annerulersillugu 39 sekuntinik siuarsimanerulerpoq.
Siuttuusulli taakku marluk ullumi ataasiakkaarluni aallartarluni sukkaniunnermi sukkanerpaanngillat, ullumikkummi Saxo Bankimeersoq Fabien Cancellara sukkanerpaavoq.
Ukiormanna Tour de Francertoqarnera aqagu naammassissaaq peqataasut Parisimi apuuffissamut Champs Elysses-imut ingerlaassammata.
Taamaalilluni Alberto Contador - assakaasuminik qaartoortaqattaanngikkuni qitsunnilluunniit qernertunit ajoqusersorneqanngikkuni, Tour de France-mi pingajussaannik ajugaassaaq.
