Connie Hedegaard USA-miippoq

- Aamarsuit mingutsitsiuarput, mingutsitsiuaannartussaallutillu, arnaq inuusuttoq suaartarpoq. Taanna allat pinngortitamik illersuiniaqatigiinnersut tuusintillit ilagalugit, Washingtonimi inatsisartut ataatsimiittarfiata silataani katersuussimapput. Barack Obamap qineqqusaarnermini mingutsitsivallaarunnaarnissaq anguniarniarlugu oqaatigiuagaa, inuit eqqaasitsissutiginiarpaat, maannakkumiimmi silap pissusaata allanngoriartornera akiorniarlugu nunat tamat isumaqatigiissutaannut, USA tapersersuilluni pituttussanersoq aamma allanit alaatsinaanneqarpoq. Danmarkimiit alaatsinaattut ilagaat, Silap pissusaa pillugu ministeri, Connie Hedegaard, ippassaq Bruxelles-imeeriarluni ullumi USA-mut tikittoq. Silap pissusaa nukissiornerlu pillugit Obamap siunnersortaa, Carol Browner Connie Hedegaardip ullup ingerlanerani ataatsimeeqatigissavaa. George Buship ukiuni arfineq pingasuni præsidentioreernerata kingorna, USA mingutsitsivallaarunnaarniartutut isigineqarunnaavikkaluarmat, maanna pisut alaatsinaalluarneqarput. Politikerimmi qinigaareeraangamik pissutsit piviusut naapertorlugit sulisariaqalerlutik, qineqqusaarutaasa saneqqutaarneqartarnerat Washingtonimi takornartaanngilaq. Taamaammat siorna qineqqusaarutaasut amerikamiorpassuit eqqaasitsissutigeqattaarpaat.

Barack Obamap decembarimi Københavnimut ataatsimiigiaqataanissaa suli neriuutigineqarpoq.