Connie Hedegaard naalakkersuisutigoortumik sinniisuutitaqarusuttoq
Silap Pissusaa Pillugu Danmarkimi ministerinngortussap, Connie Hedegaardip, Københavnimi 2009-mi silap pissusaa pillugu ataatsimeersuarnissaq sioqqullugu naalakkersuisutigoortunik sinniisuutitaqarnissaq pilersaarutigaa.
Sinniisuutitassat tallimat nunanut tallimanut aallartinniarneqarput. Sinniisuutitassat pingasut, USA-mut, Kinamut, Indiamullu aallartinneqarnissaat ilimagineqarpoq, nunat taakku silaannarmik mingutsitsinermut sunniuteqarluartuummata.
USA-p Kyotomi nunat tamat isumaqatigiissutaat atsiorsimanngimmagu, silaannaap mingutsinneqarnera pillugu nutaamik isumaqatigiissusiorsinnaanissamut Amerikamiut atsioqataarusunnissaat Danmarkimit neriuutigineqarpoq.
Sinniisuutitassat sinneri marluk sumut aallartinneqassanersut suli aalajangerneqanngilaq, ilimagineqarporli Brasiliamut, Mexicomut, Afrikamut Kujallermut, Ruslandimut Japanimulluunniit aallartinneqassasut. Danmarks Radiop nutaarsiassaleriffia taama allaaserinnippoq.