Connie Hedegaard Balimi oqalugiarpoq

Danmarkimi silap pissusaa pillugu ministeri, Connie Hedegaard, Balimi Naalagaaffiit Peqatigiit silap pissusaa pillugu ataatsimeersuarneranni oqalugiarnermini ilaatigut oqarpoq, silap pissusaata allanngoriartorneranut qanoq iliuuseqarusunngitsut kingorna kanngunartumik pissuseqarsimasutut isigineqalissasut.

Maanna kikkut tamarmik paasisimalissavaat silap pissusaata allanngoriartornera qanoq iliuuseqarfiginaveersaarlugu utaqqineq sivitsoriartuinnartillugu kanngusunnissaq alliartuinnassasoq, ilaatigut Connie Hedegaard oqalugiarnermini oqarpoq. Oqaasii sakkortunerusinnaagaluarlutik, silap pissusaata allanngoriartornerata kinguneranik nunat qanoq iliuuseqarusunngitsut, ilaatigut USA, kanngunartuliornerarpai. Nalorninerarnerit upperinninnginnerillu utoqqatsissutigalugit qanoq iliuuseqarnissamik kinguartiteriinnarneq kinguaatsinnut sunniuteqapiluttussaavoq, taamatut oqarnermini aamma USA taanngikkaluarlugu saaffigaa, USA-mmi isumaqatigiinniartuata ippassigami Naalagaaffiit Peqatigiit atorfilittaasa, silap pissusaa pillugu immikut ilisimasallit paasisaat apeqqusermagit, ilisimatuussutsikkullu misissuinernik tunngaveqannginnerarlugit nikanarsarpalaarlugit oqaatigimmagit. Ukiut kingulliit 100-t assigiinngitsutigut siuttuusimasutut europamiut USA-mik isiginnissimanerat eqqartuleramiuk, Connie Hedegaardip USA aatsaat ersarissumik taavaa, nangillunilu oqarluni USA-p maannakkut pisut pillugit aamma siuttuunissaa kissaatigalugu, tassani eqqarsaatigalugu 2009-mi Københavnimi silap pissusaa pillugu ataatsimeersuarnissap, malunnaateqarluartumik inerneqartussap maanna piareersarneqalersup angusaqarluarfiunissaa neriuutigalugu.

Nunat allat ministeriisa aamma USA sakkortuallaamik avoqqaarinaveersaarpaat, tullianimmi ataatsimeersuartoqartinagu USA allamik præsidentitaarsimasussaavoq, immaqalu taassuma silap pissusaata allanngoriartornera aningaasaqarnikkut ineriartornermiit pingaartinnerujumaarpaa.

Avatangiisinut naalakkersuisoq Ark'alo Abelsen Balimi ataatsimeersuarnermi aamma peqataavoq.