Connie Hedegaard: Allannguinissamut periarfissanngorpoq
- Ukiut arlallit piareersareernerup kingornagut, silap pissusaa pillugu maanna isumaqatigiissuteqarnissaq tullinnguuppoq. Taama oqariartuuteqarpoq Connie Hedegaard, Naalagaaffiit Peqatigiit 15-issaannik silap pissusaa pillugu ataatsimeersuartitsineranni siulittaasutut qinigaanermini.
Allattoq Elisa Isaksen
- Ilisimatusarnermi paasisat aatsaat taama ersaritsigipput. Naalakkersuinikkut piumassuseq aatsaat taamak nukittutigaaq. Ataatsimeersuarneq una "kinguaariinni atuuttuni aalajangiisuunerpaavoq, ataatsimeersuarnermut ministeri oqarpoq.
Connie Hedegaardip nunat silap pissusaanut iliuuseqarnermikkut aningaasarsiornerminnik ajorseriartitsinissamik ernummateqartut aamma eqqissisarpai.
- Aningaasarsiornikkut ineriartornissaq imaluunniit silap pissusaata sernissornissaa, arlaannaalluunniit toqqarsinnaanngilarput! Nunat tamat isumaqatigiissuteqarpata, tamanna suliffissanik pilersitsiviussaaq, COP15-imut siulittaasoq oqarpoq.