Connie Hedegaard akuerineqartutut isikkoqarpoq

Silap pissusaa pillugu kommisærissatut danskit inassutigisaat assigiinngiiaaqisut pillugit apersorneqareerluni nersualaarneqarpoq. Atomip nukinganik nukissiuuteqarneq, kommisærip biileqartitaanera kiisalu umiarsuit CO2-mik aniatitsinerat pillugu apersorneqarpoq. - Takutitsinini pillugu ajunngilluinnartumik nalilerneqarpoq, Hedegaardimik apersuinermi aqutsisuusoq EU-milu avatangiisit pillugit ataatsimiititaliami siulittaasumut tulliusoq, Dan Jørgensen, oqarpoq.

Silap pissusaa pillugu Københavnimi ataatsimeersuarnermi angusat killeqarnerat Hedegaardimut suli ajornartorsiortitsivoq. EU-p parlamentiani ilaasortap COP15-imi angusat killeqarnerat pillugu Hedegaard pisooqataanerarpaa qanorlu ililluni pitsaanerusumik suliniarneranik akissutissamik piumaffigalugu. EU-p ataatsimoorussaminik siunissami qisuariaateqartarnissaa pisariaqartoq akissutigivaa.