Congomi qinersineq eqqissisimaffiuvoq

Congomi innuttaasut millionilippassuit ippassaq qinersimmata tupinnaannartumik eqqissisimasoqarsimavoq, naak qinersinissap tungaanut eqqissiviilliornerit imaannaasimanngikkaluaqisut.

Congomi, kunngiitsuuffimmi demokraatiskiusumi, innuttaasut ukiuni 40-nit amerlanerusunit piitsuungaarlutik inooreerlutik, aamma ileqqorluffigineqangaarlutik aserorteriffiungaartumillu sorsuffigineqareerlutik, nutaamik aallartinnissaminnut ippassaq qinersinermi tassa periarfissinneqarput.

EU-mi inatsisartunut ilaasortap danskiusup, Margrethe Aukenip, qinersinermi aggustip ulluisa pingajuata tungaanut alaatsinaattussatut Europa Parlamentimit aallartitaasup, qinersinerup ingerlanneqarnera taama eqqissisimatigisumik pimmat tupigusuutiginngitsuunngilaa.

- Suna tamarmi arriitsorujussuarmik soorlu ingerlasoq,sunali tamarmi eqqissisimanangaarmataaqqissuulluagaallunilu,

qinersisartullu takutitsilluangaarmata, tupinnaannarpoq, Margrethe Auken Congop illoqarfiisa pingaarnersaannit, Kinshasamit Danmarks Radiomut ippassaq oqaluttuarpoq, Kinshasa eqqissiviilliorfiusaqisutut nalunnginneqarnerugaluarpoq.

Congomi qinersineq soqutigineqaqaluni nunarsuarmit malinnaavigineqarpoq, tassami Afrikap annersaani patajaatsumik ingerlasoqalernissaanut aalajangiisuulluinnartuusinnaammat.

Sorsuuttoqartarnerani aaqqiagiinngittoqartarneranilu congomiut 4 milliuuninit amerlanerit 1998-miilli inuunerminnik annaasaqarput. Kunngiitsuuffimmi Congomi, siornatigut Zairimik ateqaraluartumi, Patrice Lumumba 1960-mili præsidentinngormalli demokraatiskiusumik kingumut qinersiffiuvoq.

Patrice Lumumba 1961-imi toqutaavoq.