Congomi innuttaasut qimarrapput
Afrikami nunat ilaanni Congomi innuttaasut 200.000 najukkaminnit qimarrapput.
Allattoq Louise M. Kleemann
oktobarip 31-at 2008 08:20
Congomi naalakkersuisut sakkutuui pikitsitsiniallu nunami ingerlatsinermut akerliusut akersuuttorsuunerat qimarrannermut pissutaavoq.
Maanna aamma aarleqqutigineqalerpoq, akersuunnerit Congop nunatut sanilianut Rwandamut tuniluutilissasut. Rwanda ilisimaneqarpoq 1994-imi innuttaasut ilarpassuinik toqoraaffissuusimasutut.
Ikiuiniaqatigiit Røde Kors nalunaarpoq, qaammatini kingullerni marlunni sakkutuujunngitsut toqorarneqarnerat pinngitsaaliinerpassuillu pisarnerat tusartuaritik. Qimaasut pingaartumik orpippassuarnut qimaasimasut amerlangaarmata ikiuiniarneq eqqissiviilliortitsinerit pissutigalugit anngussinnaanngitsut aamma oqaluttuaraat.
Afrikami nunat siuttuisa suleqatigiiffiat Congomi pisut pillugit ullumi ataatsimiititsiniarpoq.
