Condoleezza Rice Beirutimut tikeraarpoq

juulip 24-at 2006 17:18

USA-p nunanut allanut ministeria, Condoleezza Rice, Libanonimi naalakkersuisunik tapersersuiartorluni Libanonip illoqarfiisa pingaarnersaannut, Beirutimut, tupaallatsitsilluni tikeraarpoq. Israelimiut amerikamiunit sutigut tamatigut tapersersorneqarput, naalakkersuisulli toqqissisimananngitsumik ingerlatsinerat amerikamiunit maanna ernummatigineqarpoq.

Hizbollahkkut piuneerunneqarnissaat - nunallu avannaatungiminniittup eqqisseqatigineqarnissaa - israelimiut anguniarpaat. Israelimiulli ulluni 13-ini Libanonip tungaanut qaartartumeerisaqattaartuarmata anguniakkat allanngorsimagunartut pasitsattoqarpoq. Taamaalimmat amerikamiut naalakkersuinikkut aaqqeeqataarusulerput; nunanut allanut ministerertik, Condoleezza Rice, Beirutimut tikeraartippaat.

Israelimiut sakkulersorlutik saassussisaqattaarneri iluatsittutut oqaatigineqarsinnaanngillat. Libanonimi naalakkersuisut ilungersuuteqareersut sanngiinnerusulersinneqaannarsimasutut isikkoqarmata, amerikamiut nunanut allanut ministeriat tapersersuiartorluni Beirutimut tupaallatsitsilluni tikeraarpoq.

Innaallagissiorfinnik, ikaartarfinnik innuttaasullu najugaqarfiinik israelimiut qaartartumeerisaqattaarnerisa kingunerisaanik naalakkersuisut siulittaasuat, kristumiu, Fouad Siniora, ilungersuatinneqarpoq. Israelimiut amerikamiullu taama pisoqarnissaa takorloorsimanngikkaluarpaat. Taamaattumik hizbollahkkut piuneerunneqarnissaannik piumasaqarnertik israelimiut maanna tunuartippaat, amerikamiullu israelimiut sakkulersorlutik saassussisaqattaarneri tapersersorunnaarpaat. Libanonimi innuttaasut toqqissisimanartumik eqqissisimanartumillu inuuleqqinniassammata sukkanerpaamik sakkuaakkunnaarnissaq amerikamiut nunanut allanut ministeriata piumasaraa. Naalagaaffiit Peqatigiit hizbollah-kkullu aserukkanik aaqqissuusseqqinnermi aningaasaliissuteqannginniassammata, amerikamiut nunanut allanut ministeriat aningaasanik ikiorsiissutissanik neqeroorutissaqarpoq.