Columbiami ujaarineqarnerpaaq kiisami tigusarineqarpoq
Colombiamiu 44-nik ukiulik illoqarfissuup São Paulo avatinnguani inissiami luxusioqisumi mobiltelefonerpassuaqarluni, kuulterasaanillu nalunaaqutaararasaarluni, 5.5 millioni koruuninillu tigoriaannarnik aningaasaateqartoq tigusarineqarsimavoq.
Juan Carlos Avadiasip, aamma taaguuteqartup Chuppeta, isumaqartoq ”Milluartagaq” tigusariniarnera ajornaatsuinnaasimanngilaq.
Angut taanna ikiaroornartumik tuniniaasartuinnaanngilaq. Colombiami inupiluit akornanni inupiloqatigiinni Norda del Valjekkunni pissaaneqaqisuni pilersaarusiortartuuvoq.
Maannakkullu killisiorneqaleruni Colombiami toqutani 300-t, USA-milu ikinnerpaamik inuit 15-it, nassuiaateqarfigisussaavai, tigusarineqarnerata kingorna politiit pisortaat taama oqarpoq.
Chupetta USA-mit 2004-mi ujaarineqangaarmat, tigusarineqarnissaanut sumiinneranik kikkulluunniit paasissutissiisinnaasut 27 millioni koruuninik akissarsisinneqarnissaat neriorsuutigineqarsimavoq.
Chupetta unnerluutigineqarpoq, kocaininik tonserpassuarnik USA-mut Europamullu nassiussuisarsimasutut.
Ikiaroornartuerniaruttulernermi nalaani USA-mi Colombiamilu politiit inuillu imminik paasissutissiisinnaasut toqutaatittarsimavai.
Illorsuarsuit 30-t tassanngaannaq pilersaarusiorluakkamik politiinit isaaffigineqaqattaarlutik uppernarsaatissanik misissuiffigineqarmata Juan Carlos Avadiasip nulia, inuillu allat aqqanillit, tigusaapput. Ujaasinerni nassaarineqarput, ikiaroornartut, aallaasit, biilit aqerlunit pitarneqarsinnaangitsut, Jetskiit, angallatillu tissiartaatit, ataaseq 5 millioni koruunit sinnerlugit naleqartoq. Tamakku tamarmik assaarinnissutigineqarsimapput.
Chupettasip najugaani luxusioqisumi, nakussassartarfeqarluni saunartarfilimmi, fjernsynipiluunersuaqartumi, naluttarferujussuaqartumilu nunat allamiut aningaasaat assigiinngitsut katillugit 5.5 millioni koruunit sinneqartut nassaarineqarsimapput.
Amerikami oqartussaasut oqarnerat malillugu, Chupetta Colombiami inupiluit ittuat 10 milliardi koruunit sinnerlugit aningaasaateqarpoq,
naak gangsterit silarsuaanni allanut akiitsoqarfeqarunaraluarluni.
Brasiliami USA-miluunniit eqqartuussaassanersoq suli ilimaneqanngilaq.
Tigusarineqarneranullu atatillugu kina 27 millioni koruuninik aningaasannassanersoq suli erseqqissumik paasineqanngilaq.
