Columbia University-mi oqalugiartoq illaatigaat

Allattoq Najaaraq Egede
septembarip 25-at 2007 07:15

Iranimiut præsidentiat Mahmoud Ahmadinejad amerikamiut ilisimatuarfiisa ilaanni Columbia University-mi ippassaq oqalugiarnermini tikilluaqqusaavallaarsimanngilaq.

Allaammi ”kussissutut, ajortorsuartut, ulorianartutut illaruaatissaannartullu”, ilisimatusarfiup pisortaanit Lee Bollinger-imit ilisaritinneqarpoq. Taamaakkaluartoq

Ahmadinejad qunutitassaasimanngilaq.

- Iranimi ileqquuvoq qaaqqusat ataqqinnittumik pissuseqarfigisarnerat. Kulturitsinniippoq. Taama oqarnermigut Columbia University-p pisortaa tamat isummanik ammasumik oqaaseqarsinnaatitaanerannik oqaaqqissaappaa, ersaattaanneqaqalunilu.

Apeqqutinulli ikaarsaarnermi arnat arnaqatiminoortarnerat angutillu anguteqatimminoornarnerat eqqartorneqalermat, Iranip præsidentia nassuiaavoq, tamakku Iranimi nassaassaanngitsut.

- Iranimi tamakkoqanngilaq. Peqarnerarlugu kiap salloqittaramisi. Taama oqartorlu najuuttut illarrattorsuanngorsimapput, Buu-millu nillerrattorsuanngorsimallutik.