Ikiaroornartunik eqqussuisartoq Dairo Antonio Usuga (talerperleq) aamma Otoniel-itut ilisimaneqartoq, arfininngormat Colombiami sakkutuut, politiit sakkutuullu timmisartunik angalasut ikioqatigiillutik tigusaraatAss. Colombian Police/ReutersAssi: Colombian Police/Reuters

Colombiami ikiaroornartunik eqqussuisartut tusaamanerlugaanersaat USA-mut tunniunneqassaaq

Ikiaroornartunik eqqussuisartup Dairo Antonio Úsuga-p tigusariniarneqarnerani sakkutuut 500-t sinnillit qulimiguullillu 22-t peqataapput.

Colombiami ikiaroornartunik eqqussuisartoq ujaarineqarnerpaaq, Dairo Antonio Úsuga, arfininngormat tigusarineqartoq USA-mut tunniunneqassaaq.

Ataasinngormat Danmark-imi nalunaaqutaq naapertorlugu unnuakkut BBC taamatut allaaserinnippoq.

Ikiaroornartunik nioqquteqartartoq aamma Otoniel-itut ilisimaneqartoq, Golfklanen-inik taaneqartartut siuttoraat. Taanna arfininngormat illoqarfimmi Necolí-mi, caribiap sineriaanut qanittumi Panama-p killeqarfiata eqqaaniittumi, sakkutuut nunakkoortut timmisartunillu angalasut kiisalu politiit tigusaraat.

Golfklanen tassaapput Colombiami ikiaroornartulerisartut pissaaneqarnerpaat Colombia tassaavoq nunarsuatsinni kokainimik nioqquteqarfiit annersaat, USA pingaarnertut niuerfigisarlugu.

Taamaammat Otoniel amerikami politiit ikiaroornatunik suliallit (DEA) ujaarisaanni pingaarnerpaatut tigusariniagaat.

Ikiaroornatulerisartup taassuma tigusaanissaanut ikiuuttoq 5 miliuuni dollarinik – 32 miliuuni koruunit missaannik nalilinnik - neriorsorneqarnikuuvoq.

Colombiap illersornissamut ministeria, Diego Molano, aviisimut El Tiempo-mut oqarpoq, taassuma USA-mut tunniunneqarnissaa oqartussat pilersaarutigigaat.

Ikiaroornartulerisartup tigusariniarneqarnerani sakkutuut 500-t qulimiguullillu 22-t peqataapput. Tigusariniarneqarnerani politeeq ataaseq toqusimasoq BBC allappoq. Taanna qanoq ililluni toqusimanersoq nalunaartutigineqanngilaq.

Arfinngormat Otoniel-ip tigusaanera nunarsuatsinni immaqa ikiaroornartulerisartup tusaamanerlugaanerpaap Pablo Escobar-ip 1993-mi toqutaaneranut, Colombiami præsidentip, Iván Duque Márquez-ip, assersuuppaa.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat