CO2 pillugu Arnold Schwarzenegger ilungersorpoq

Naatitsivittut silaannarmut sunniutit akiorniarneranni California USA-mut naleqqiullugu siuarsimanerulerpoq.

Filmimi ”The Terminator”-imi pingaarnertut inuttaasoq - Californiami guvernøri, Arnold Schwarzenegger, naalagaaffimmilu politikkikkut suliaqartut sinneri, aalajangerput, suliffeqarfissuit gassimik CO2-mik aniatitsisarnertik annikillisassagaat piumasarineqassasoq.

Inatsit nutaaq naapertorlugu naalagaaffiup CO2-mik aniatitsisarnera 25 procentimik ukioq 2020-mi annikillisinneqarsimassaaq, suliffeqarfissuillu – soorlu uuliamik akuiaaffissuit cementiliorfissuillu inatsisit malissagaat aamma piumasaqaataassaaq. Schwarzeneggerip taama iliorniarnera parteeqataata, republikanereqataatalu, USA-p præsidentiata, George W. Buship, qanittukkut itigartikkaluarpaa.

- Silaannaap allanngoriartorneranut naalagaaffiit nunallu allat akiuiniarnerannut iluatsitsinerput assersuutissarsisitsissaaq, Schwarzenegger nutaarsiassaqartitsivimmut Reuterimut oqarpoq.

Aviisi New York Times naapertorlugu Schwartzenegger Californiami inuussutissarsiornermik sulialinnit republikanerinillu sakkortuumik akerlilersorneqaraluarpoq, Schwarzeneggerili, novembarimi qinigaaqqinnissaminik naatsorsuuteqartoq, silaannaap allanngoriartorneranut akiuiniarluni suliniuteqarluartuuvoq.