CO2 pillugu amerikamiut paasissutissiiumapput

Silap pissusaa pillugu Københavnimi ataatsimeersuarnissaq sioqqullugu ministeriuneq Lars Løkke Rasmussen amerikamiut præsidentiannit Obamamit maanna neriorsuutisivoq.
Allattoq Najaaraq Egede
novembarip 17-at 2009 09:32

CO2-mik aniatitaminnik qanoq annertutigisumik killiliisinnaatiginerluni kisitsisinik ersarissunik saqqummiussiniarluni USA neriorsuivoq. Nalunaarut taanna qanoq isumaqarnersoq DR-ip silap pissusaa pillugu tusagassiisartua Klaus K. Nielsen nassuiaavoq.

Københavnimi iluatsitsinerup iluatsitsinnginnerulluunniit killinga toqqaannartumik ima oqaatigineqarsinnaavoq, isumaqatigiissusiortoqarsimanersoq silap pissusaatigut uuttorneqarsinnaasussaassalluni.

Ima paasillugu silap pissusaatigut uuttuisoqarsinnaassappat, nunat ataasiakkaat kisitsisinik aalajangersimasunik neriorsuinerat aqqutigalugu isumaqatigiissusiortoqartariaqassaaq. Ilisimavarpullu USA tamanna pillugu ajornartorsiuteqartoq, senatimi tamanna pillugu inatsisissaq isumaqatigiissutigineqarsinnaanngilaq. Maannali neriorsuummik peqarluni Københavniliarnissani Obamap Lars Løkke Rasmussen neriorsorsimarpasippaa, tamannalu isumaqatiginninniarnissamut sunniuteqanngitsoornavianngilaq.

Barach Obama Kinamilu qullersaasoq, Hu Jintau Beijingimi maanna ataatsimiipput silallu pissusaa eqqartugaasa ilagaat.

Københavnimi anguniakkavut tassaapput ministeriunerup Rasmussenip eqqaareerai, ilaannakuusumik isumaqatigiissutaanilu naalakkersuinikkut pituttuisuunngitsumik isumaqatigiissutaanngitsoq, kisiannili silap pissusaata unammilligassartai ataatsimoortut pillugit isumaqatigiissut, erngersumillu sunniuteqartussaaq, præsident Obama Beijingimi taama oqarpoq. Tamatuma saniatigut USA aamma Kina, taakku nunarsuarmi CO2-mik aniatitsinerpaasuusut, peqataanngippata pitsaasumik isumaqatigiissuisortoqarsinnaanngitsoq erseqqissaatigaa.

Ministeriunitta ullumi oqaaserisaanut sanilliullugu Obamap oqaasii qanoq inissisimanersut Klaus K. Nielsen aperineqarami, Lars Løkke Rasmussenip oqaasiinut nangitsinerusuusut oqaatigaa. Isumaqatigiissummi erngersumik sunniuteqassasoq Obama oqarami, taava USA kisitsisinik aalajangersimasunik tunniussinnaasaminik saqqummiussiniartoq paasinarpoq, kisitsisimmi saqqummiunneqanngippata CO2-mik aniatitat annikillisinniarnerat aallartinneqarsinnaanngilaq, taamaammat oqaaserineqartut imminnut attuumassuteqarluinnarput.