CO2-mik tunisaqartarneq unioqqutinneqartalereerpoq
Tuluit Nunaanni ilanngaaserisut akileraarutillu pillugit oqartussaasut, Europami politiit suleqatigiiffianik Europolimik suleqateqarneratigut angutit arfineq marluk arnallu marluk peqquserlullutik CO2-imik tuniniaasimasut tigusaraat. CO2-imik tunisaqarnermi akitsuutaasumik MOMS-imik 324 millioner koruunit nalinginik peqquserluuteqarsimammata.
Peqquserlullutik tigusarineqartut, nunani allani akitsuutitaqanngitsumik CO2-inik pisisimassangatinneqarput, pisiatillu tuluit nunaanni akitsuuserlugit tuniniaqqissimallugit.
Suliffeqarfiit CO2-imik pisisimasut, akitsuutaannik pisortanut akiliutigineqartussat akilerneqartinnagit, suliffeqarfiit matusarsimapput akitsuutillu pisortanut akiliutigineqartussat tammarlutik.
Europami politiit suleqatigiiffiat Europol CO2-mik tuniniaasarnermi peqquserluuteqartartut nakkutiginerulersimavaat.
Tuluit nunaanni peqquserluttuliortoqarsimanerata takutippaa peqquserluttuliortartut qanoq nassaarniallaqqitsiginerat, attaveqarnermut pisortaq Søren Kragh Pedersen aviisimi Jyllandspostenimi taamatut issuarneqarpoq. Europami politiit suleqatigiiffiat Europol EU-imi nunat allat CO2-imik tunisaqartarnermi peqqusserluttuliortartunik ujartuisoq oqaatigaa.
