CO2-mik toqqorterisoqarsinnaanersoq misilinneqarpoq

Svalbardip nunataani qeriuaannartumi, kilometerimik ataatsimik itissusilimmi, CO2-mik toqqorterisoqarsinnaanersoq, Norgimi ilisimatuunit misileraatigalugu maanna aallartinneqarpoq.
Allattoq Elisa Isaksen
juulip 13-at 2010 05:59

Nunami 970 meterinik itissusilimmi ussiitsumi, qaarusuliami ujaqqat sillisissat allattarfissiallu akornanni, nunami qeriuaannartumi, CO2 toqqorterneqarsinnaasoq, ilisimatuut oqaatigigaat, aviisimi Ingeniørenimi allaaserineqarpoq.

Toqqorsiviginiarneqartoq Svalbardimi illoqarfiup Long-yearbyenip avatinnguani Adventdalimiippoq. Illoqarfik taanna Norgimi kisiartaalluni aamarsuarnik atuisumik nukissiorfeqarpoq, nukissiorfiullu taassuma CO2-mik mingutsitai, silaannarmut aniatinnagit, nunamut toqqorterniarneqarput. Silap pissusaanut ajoqutaannginnissaa matumani anguniarneqarluni.

Maani pinngortitaq malussarissorujussuugami. Matumani siunertarineqarpoq CO2-p nukissiorfimmeersup nunap iluanut utertinnissaa, Taamaalilluni Long-yearbyen Norgimi illoqarfinni siullerpaalluni CO2-mik mingutsitsiffiunngitsutut illoqarfiulissaaq, suliniummi pisortaasoq, Snorre Olaussen, issittumi ujarassiornermi ilisimatuujusoq, oqarpoq.

Ilisimatuut piffissami aggersumi, periaatsip atorsinnaanera paasiniarlugu, nunap iluani qaarusuliamut imermik immiissapput.

Misiliineq iluatsissappat CO2, avatangiisinut ajoqutaasoq taanna, ukiuni 10.000-ini toqqortarineqarsinnaassasoq, ilisimatuut neriuutigaat.