CO2-mik mingutsitsinerup annikillisarniarnera ajornakusoortupilussuuvoq
Nunarsuatsinni CO2-mik mingutsitsineq annertusiartuinnartoq, Naalagaaffiit Peqatigiinni aningaasaqarnermut immikkut ilisimasallit pisortaat, Kirsten Halsnæs oqarpoq.
- Naalagaaffiit imminnut piumaffigeqatigiillutik mingutsitsinermik annikillisaaniarnerata piviusunngortinnissaa ilimagisamiit ajornarnerusoq nassuerutigisariaqassavarput, Kirsten Halsnæs oqarpoq.
Misissuinerit takutippaat nunat aningaasaqarnikkut siuariartortut aamma CO2-mik mingutsitsinerujartortut.
Taamaammat mingutsitsinngitsunik nukissiortoqarnerulinngippat, allatigullu mingutsitsinaveersaartoqanngippat mingutsitsineq annertusiartuinnassaaq.
Kyotomi isumaqatigiissut naapertorlugu Danmarkip 2012-ip tungaanut mingutsitsinerminik procentinik 21-nik annikillisitsinissaq siunniukkaluarpaa, kisianni maannakkumut piviusut naapertorlugit procentinik marlunnik mingutsitsinerulersimavoq.
Naalagaaffiit Peqatigiit CO2-mik mingutsitsinerup annikillineqarnissaanik piumasaqaataat, Kalaallit Nunaanni aamma anguneqarsinnaanngitsoq Naalakkersuisup, Kim Kielsenip Sermitsiamut oqaatigaa. Taamaammat Kalaallit Nunaata mingutsitsinerminut matussutaasussanut akiliisalernissaa, aatsitassarsiornerup kinguneranik annertusiartoriaannaavoq.
Kalaallit Nunaanni qanoq mingutsitsinermik annikillisaasoqarsinnaanersoq, Silap pissusaata allanngoriartornera, Nukissiornerlu pillugit allaffeqarfittaami maanna nalunaarsarniarneqaleruttorpoq.