CO2-mik mingutsitsineq unikaallassinnaalerpoq
Nunat ineriartorfiusut CO2-mik mingutsitsinerat unikaallattussanngorlugu, nunat tamalaat Canada-mi Montrealimi FN-ip ataatsimiisitsinerani isumaqatigiittoqarpoq.
Silaannaap kiatsikkiartornera akiorniarlugu, Montreal-imi FN-ip ataatsimeersuartitsinerani, CO2-mik mingutsitsineq akiorniarlugu nunat tamalaat isumaqatigiissutaat Kyoto-meersoq eqqartorneqarpoq. Isumaqatigiissutip 2012-ip tungaanoortup, kingorna sivitsoqqinneqarnissaa aamma aalajangerneqarpoq.
Kyotomi isumaqatigiissummut USA peqataarusuttarsimanngitsoq, isumaqatigiissummut ilaarusunnginnermut aalajangiusimanini tupaallaatigineqartumik qasukkaamivaa. Tamanna pilerpoq USA-mi Senatorit borgmesterillu arlalissuit mingutsitsinnginnerunissamik suliniaqataanissamut piumasaqareersullu. Taamaasilluni USA, CO2-mik mingutsitsinermi annikillisaaqataalernissamut ammanerulerpoq.
Kyoto-mi isumaqatigiissummi 2012-ip tungaanut ingerlagallartussami, nunat assigiinngitsut ineriartorfiusut 40-t, CO2-mik mingutsitsissarnerisa killileqarnerulernissaat ilusilersorneqassaaq.
Danmarkimi avatangiisit pillugit ministeri Connie Hedegaard, silaannaap allanngoriartornera pillugu aasaq manna nunat assigiinngitsut Ilulissanut aggersarpai, tamannalu nunarpassuarnit tupaallatsitsisimavoq. Tassani sermersuup aakkiartornera qanoq sukkatigisumik ingerlasoq paasineqarpoq. Taamaammat silaannarmik mingutsitsinerup millisarneqarnissaa, nunanit assigiinngitsorpassuarnit soqutigineqarluinnartoq, Connie Hedegaard oqarpoq.