CO2-mik aniatitsivallaannginnissaq anguniarpaat
CO2-mik aniatitsivallaannginnissaq pillugu nunat tamat isumaqatigiissutaannut USA ilanngunnialerunarpoq, ukiullu kingulliit arfineq-pingasut ingerlanerini aatsaat taama ersaritsigisumik oqariartuuteqartoqartoq, EU-kommissionip siulittaasua José Manuel Durão Barroso oqarpoq.
Allattoq Mads Lynge
Nunat pisuut G8-mik taaneqartartut Japanimi ulluni makkunani ataatsimiipput:
- Mingutsitsivallaannginnissamut USA-p pisussaaffeqarnissaa suliniutigissavarput, Barroso oqarpoq, nangipporlu:
- Suli tamanna angunngilarput, USA-minngaanniilli oqariartuutigineqartut isumalluarnarput. Isumaqatigiissutinik atsioqataassaguni nunat mingutsitsiffiungaatsiartut allat, soorlu Kina aamma India peqataasariaqartut USA-p piumasaraa, Jose Manuel Barroso oqarpoq.