CO2-mik aniatitsisarneq akikinnerulerpoq
Silap pissusaa pillugu Københavnimi ataatsimeersuarup angusaqarfiuallaanginnerata kingorna CO2-mik aniatsisinnaanermut akuersissutit akiat appariarujussuarpoq, tamatumalu malitsigissaanik silaannarmut CO2-mik aniatitsisarneq akikinnerulerpoq. Taamaammat CO2-mik aniatitsisinnaanermut akuersissutinik tapersersuilluni pisiortornissamut EU siuttuusariaqartoq Socialdemokratit maanna siunnersuutigaat.
Soorlu oqaluttuarisaanerup ingerlanerani akit qaffasissusaat nikitsaaliorumallugu punnermik immummillu EU pisiortortareersimasoq taava maanna akigitinneqartup appannginnissaa angujumallugu CO2-mik aniatitsisinnaanermut akuersissutinik pisiortortariaqarpoq, taamaalilluni suliffeqarfiit pinngitsoornatik mingutsitsinaveersaarsinnaaniassammata, taama siunnersuuteqarpoq Ole Hækkerup Socialdemokratit oqaaseqartartuat.
Silap pissusaa pillugu ataatsimeersuareernerup kingorna pitsaasumik silap pissusaa pillugu anguniagaqartoqassappat, EU maannamiit siuttuusariaqarpoq. Silallu pissusaata ajunnginnissaa qaquguluunniit akilersinnaajuassappat EU taama iliortariaqarpoq, CO2-lli akia taama appartigitillugu taama iliorsinnaanngilagut, Ole Hækkerup oqarpoq.
Silap pissusaanut akornutaanngitsumik iliuuseqarniaraanni akigitinneqartoq annertuumik qaffanneqartariaqarpoq.
Tamatuma siuarsarnissaanut atatillugu naatsorsuinerit amerlasuut ingerlanneqarsimapput, isumaqatigiissutaavorlu 25 euro-t sinnerlugit akeqartinneqartariaqartoq, maanna akigitinneqartoq 12 euro-t missaanniittoq eqqarsaatigigaani taava suli anguniagaq ungasippoq, nioqqutissanik naammassineqanngitsunik tuniniaasartoq Ole Slot Hansen Saxo-bankimeersoq taama oqarpoq.
CO2-p tonsip ataatsip akia tassa marloriaatinngortariaqarpoq. CO2-lli akiata qaffannera danskit suliffeqarfiutaannut 400-juusunut Europamilu suliffeqarfinnut 12.000-inut CO2-mik aniatitsisinnaanermut akuersissutinik aningaasartuuteqarnerulernermik aamma kinguneqassaaq. Ole Hækkerupilli upperaa EU taama iliuuseqartinneqalersinnaasoq.
Tamanna piviusunngortinneqarsinnaalluartoq isumaqarpunga, tassami Kyotomi isumaqatigiissut aqqutigalugu taama iliuuseqarnissaq EU-p Japani peqatigalugu siuttuusinnaanini nunarsuup sinneranut takutereernikuuaa.
Silallu pissusaa pillugu ataatsimeersuarnermi isumaqatigiissummut EU Japanilu annertunerpaamik aningaasaliisuupput, taamaammat EU aamma Japan oqaannariaapput, maanna pisoq pitsaanerpaajunngitsoq, taamaammallu nunarsuarmi silap pissusaa pillugu anguniagassanik nutaanik saqqummiussisariaqarpugut, siumukartariaqarattami
