CO2-mik aniatitsinikinnerulerpugut

Kalaallit Nunaanni Naatsorsueqqissaartarfiup naqitaq - Kalaallit Nunaanni nukissiornermi atuineq 2009 - ataasinngormat saqqummersippaa. Nukissiornermi nukik atugaq 2008-p kingorna 10,5 procentimik apparsimasoq, kiisalu nukimmik atuinermi CO2 aniatinneqartoq 2008-p kingorna 13 procenterpiamik apparsimalluni.

Apparneranut pissutsit arlallit peqqutaapput. Ilaatigut 2009-p ukiaa 2008-mut naleqqiulluni kiannerusimavoq, taamaattumillu kiassarnermut uulia atugarput annikinnerusimalluni.

- Kalaallit Nunaanni Naatsorsueqqissaartarfiup nukissiornermut kisitsisitigut paasissutissaatai aqqutigalugit, ukiuni kingullerni nukissiornermut politikki aammalu erngup nukinganut aningaasaliissutit aningaasaqarnitsinnut, inuiaqatigiit ineriartornerannut aammalu silap pissusaanut iluaqutaalluinnarsimasut takutinneqarmat nuannaarutigilluinnarpara, Ineqarnermut, Attaveqarnermut Angallannermullu Naalakkersuisoq Jens B. Frederiksen oqarpoq.

Pingaartumik nukissiornermi tamarmiusumi nukissiuutit ataavartut atorlugit nukissiarineqartoq 2008-mut naleqqiullugu sisamariaatip ataatsip missarpiaanik annertusisimammat maluginiassallugu pingaaruteqarpoq. Erngup nukinganut aningaasaliingaatsiarnitta maanna malunniutivinneranut tamatumunnga pissutaavoq. Qorlortorsuarmi erngup nukinganik innaallagissiorfiup aamma Utoqqarmiut Kangerluarsunnguanni erngup nukinganik innaallagissiorfiup allilerneqarnerata 2008-mi aasakkut ammarneqarneranniit uuliamik atuineq annertuumik annikillisinneqarsimavoq.

- Nukimmik immitsinnut pilersornerput ullumikkut aatsaat taama annertutigaaq, naatsorsuutigaaralu Sisimiuni erngup nukinganik innaallagissiorfiup ukiup ataatsip matuma siornatigut ammarneqarnera pissutigalugu 2010-mi annertuseqqikkumaartoq. Ilulissani erngup nukinganik innaallagissiorfik 2013-imi ammarpat, nukissiuutit ataavartut atorlugit innaallagissiornitsinni aammalu immitsinnut pilersornitsinni ineriartorneq suli pitsaanerusoq takussavarput, Jens B. Frederiksen oqarpoq.

Ineriartorneq aqqutissat eqqortut aqqutigalugit ingerlanneqarmat nuannaarnarpoq. Kisiannili Naalakkersuisut suli ineriartortitsinerup pitsaanerusumik ingerlanissaanut kaammattuinissartik pingaartippaat. Suliniutit arlalissuit, ilaatigut nukissiornermi pitsanngorsaanissanik qulakkeerinikkut, aammalu ukiuni tulliuttuni CO2-mik aniatitsinerup annikinnerulersinneqarnissaat aqqutigalugit tamanna ingerlatissavarput. Tassani ilaatigut inissialiortiternerni nukimmillu pilersuinermi nukimmik atuinermik pitsanngorsaanerit, erngup nukinganik innaallagissiornerup annertusarneqarnerata ingerlateqqinneqarnissaa, aammalu eqqakkanik ikuallaavinnit kissap sinneranik atorluaanerup pitsaanerulersinneqarnissaa pineqarput.

- Innuttaasut aammalu inuiaqatigiinni kalaallini immikkoortut tamarmik inuiaqatigiinnut silallu pissusaanut iluaqutaasumik ineriartornerup siumukarnerata ingerlaannarnissaanut ataatsimut akisussaaffeqarnerput tapersersorumaaraat neriuutigaara, Ineqarnermut, Attaveqarnermut Angallannermullu Naalakkersuisoq Jens B. Frederiksen naggasiivoq.