CO2-mik aniatitsinerusinnaanerput sulissutigiumavaa
Sila pillugu ministerip Naalakkersuisullu siulittaasuata Kuupik Kleistip ataatsimeereerneranni tamanna erserpoq Connie Hedegaardillu ataatsimiinneq kinguneqartussaasutut nalilerpaa. Ataatsimeereerneranni ministeri oqaloqatigaarput.
Kuupillu marluulluta pimoorussilluta oqaloqatigiilluta aallartippugut. Suliammi uuma pitsaasumik naammassineqarnissaa tamat soqutigisaraat, soorlu aningaasaqarneq avatangiisillu eqqarsaatigalugit Kalaallit Nunaanni attanneqarsinnaasumik naammassineqartariaqartoq. Maanna assigiinngitsunik isumaqatigiissuteqarpugut taakkulu atorfilittatsinnut misissortillugit aallartippagut.
Tamakkualu assigiinngitsuupput, soorlu apeqqutit imaattut, Kalaallit Nunaanni aningaasaqarnikkut ineriartorneqalerpat taava qanoq iliortoqassava, tamakkulu apeqqutaapput imaannaq akineqarsinnaanngillat. Naalagaaffeqatigiinnerummi iluani naalakkersuinikkut aaqqiissutissanik Kalaallit Nunaata attassinnaasaanik ujaasisariaqarpugut.
Piviusunngortinneqarnissaa pillugu inuiaqatigiinnit kalaallinit isigalugu qanoq innersoq paasisariaqarpoq, aamma inuiaqatigiit namminneq qanoq iliorniarpat, qanoq iliorsinnaappat periarfissat suuppat aamma qanoq annertutigisut eqqartorpavut.
Tamakku naalagaaffeqatigiinnerup iluani eqqartorneqarnissaat pissusissamisuuinnarpoq, tamannalu statsiministerip sapaatit akunnerani kingullermi tamaaniikkami aamma erseqqissarpaa.
Taamaammat aallarniutaasumik oqaloqatigiinnerput aallartilluarpoq oqaloqatigiissutigisavullu malitseqartissavavut, aamma Danmarkimi ministereqarfiit arlallit tamanna soqutigalugu malinnaaffigigaat nalunngilara. Taamaammat illuatungeriilluta oqaloqatigiinneq ingerlateqqikkusupparput ajornartorsiuterujussuartullu paasinagu, aammami taamaassorinnginnakku. Sila pillugu Danmarkimi ministeri Connie Hedegaard taama oqarpoq.
Connie Hedegaardip silaannaq pillugu oqaloqatigiinnerup inernera ualeru marlup-qeqqanut tusagassiortunik katersortitsinermigut oqaluttuarissavaa.
