CO2-mik aniatitsinerup annertussusaa paaserusuppaa
Demokraatit sinnerlugit Inatsisartuni ilaasortap, Marie Fleischerip nunatsinni CO2-mik aniatitsineq pillugu naalakkersuisunut pingasunik apeqquteqarpoq. 1990-imiit ullumimut CO2-mik aniatitsineq, Marie Fleischerip siullertut paaserusuppaa, aappaattullu nunatsinni CO2-mik aniatitsineq millisinniarlugu ataatsimut suleriaasissamik peqarnersoq apeqqutigalugu.
2012-imummi ukiut tallimaannanngormata, Kalaallit Nunatsinni inuit akisussaaqataallutik iliuuserisinnaasaat pillugit sorpiaat aallartisarneqarsimanersut Marie Fleischerip paaserusuppaa.
Kyotomi isumaqatigiissut naapertorlugu Danmarki isumaqatigalugu sinaakkutassiineq malillugu 1990-imi aniatinneqarsimasoq aallaavigalugu, 2008-miit 2012-ip tungaanut gassinik silaannarmik kissakkiartortitsisartunik aniatitsineq Kalaallit Nunaanni 8 procentimik appartinneqartussaavoq.
Pingatsiullugu apeqqutigineqarpoq suliffissuaqarnermi siunissamilu pisuussutit uumaatsut tunisassiarineqarnerini aniatitat killiliunneqartumi ilanngunneqassanersut, tassani Marie Fleischerip ALCOA-mit suliffissuartut pilersaarutigineqartoq ilaatigut eqqarsaatigaa.