CO2-mik aniatitsineq annertoorujussuuvoq

Gassimik silaannarmik kissakkiartortitsisartumik, CO2-mik Indiami Kinamilu aniatitsineq ima annertutigaaq, Naalagaaffiit Peqatigiit silap pissusia pillugu ataatsimiittartoqatigiivisa siulittuutigisimasaat ajornerpaamik qaangersimallugit, aviisimi Berlingske Tidendemi taama allaaserinnittoqarpoq.
septembarip 29-at 2008 06:49

Ingerlatseqatigiiffik Global Carbon Project naapertorlugu, silaannnaap CO2-mik 2007-imi mingutsinneqarsimanera ukiumut siulianut naleqqiullugu aatsaat taama annertutigaaq, aamma 2000-imiit 2007-ip tungaanut mingutsinermit annertunerulluni.

CO2-mik aniatitsinermut inuit ilaatigut pisuusarput, soorlu nukissiorfeqarneq, suliffissuaqarneq orpippassuarnillu nungusaaneq aqqutigalugu gassimik silaannarmik kissatsikkiartortumik aniatitsineq ukiuni arfineq-marlunni kingullerni sisamariaammik annertunerulersimalluni.

-Nalunaarusiap ajoraluartumik takutippaa, CO2-mik aniatitsineq ilisimatuut ukiut arlalialunnguit matuma siorna siulittuutaannit sukkanerullunilu annertunerujussuusoq, silap pissusaa pillugu danskit ministeriat, Connie Hedegaard, oqarpoq.

-Suliassarli ajornakusooraluaqisoq, silap pissusaa pillugu Naalagaaffiit Peqatigiit Københavnimi aappaagu ataatsimeersuartitsinissaanni nunarsuarmi nunat tamarmik nutaamik isumaqatigiissusiornissamik isumaqatigiissuteqartariaqarput, Connie Hedegaard aviisimit Berlingske Tidendemit apersorneqarnermini oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq