CO2-imik aniatitsineq nunarsuarmi aqutsisunut annikilliseqquneqarpoq
Nunarsuaq ataasiuvoq, silaannaq anersaartorfigisaq ataasiuvoq, upperisaq nunalu suminngaaneerfik apeqqutaanani.
Nunarsuarmi aqutsisut paasitinniarneqarput, upperisarsiortut tungaanniit nunarsuarmi silap pissusaata allanngoriartornera aamma malinnaaffigineqarmat, Sofie Petersen oqarpoq.
”Nunarsuaq ataasiuvoq silaannaq anersaartorfigisarput ataasiuvoq taamaattumillu aggulussinnaanngilagut, taamaattumillu suleqatigiittiariaqarpugut, upperisarsiortunit aammalu nunamit suminngaaneeraluarutta apeqqutaanani ” Sofie Petersen oqarpoq.
Nunarsuarmi aqutsisut kajumissaaruteqarnermi piumaffigineqarput, silaannarmik mingutitsinerup CO2-ip annikillisinneqarnissaanik qanoq iliuuseqaqqullugit, tamasssumalu pimooruttariaqarnera kajumissaaruteqarnermi erseqqissarneqarpoq.
København-imi aappaagu silap pissussaata allangoriartonera pillugu ataatsimeersuartoqartussaavoq, tassanilu Kyoto-mi isumaqatigiissut allanngortinniarneqartussaalluni, taamaattumillu upperisarsioqatigiit kajumissaarummik atsioqatigiipput.
Kalaallit Nunaata Biskoppiata Sofie Petersen-ip nunarsuarmi upperisarsiortut siuttui allat kajumissaarummik atsioqatigai novemberip ulluisa 30anni Sverige-mi illoqarfimmi Uppsalami. Upperisarsioqatigiit siuttui nunaminnut uterunik atsioqatigiissutigisartik pillugu naalakkersuisuminnut ingerlateqqissavaat.
