CO2-imik aniatitsineq ilimagisamit annertunerussangatinneqarpoq
Norgimi Bergens Universitets Bjerknesscenterimi ilisimatusartut nuimasut marluk, nutaamik ilisimatusarnermikkut tamanna paasigaat, Norgimi aviisimi Dagsavisen-imi allaaserinnittoqarpoq.
Ilisimatuut Eystein Jansenip aamma Helge Drangep naatsorsuinermikkut paasivaat, nunarsuup silaannartaaniittoq CO2 siusinnerusukkut oqaatiginiarneqartarneranit 20 imaluunniit 25 procentimik annertunerussasoq. Tamatumunnga patsisaanerarpaat, pinngortitap gassinik kissakkiartortitsisunik siornatigutut annertutigisumik nungutitsiartorsinnaajunnaarnera. Ilisimatuut taakku marluk oqaatigaat, tamanna naalakkersuinikkut sakkortunerusumik iliuuseqarfigineqartariaqartoq. Helge Drangep oqaatigaa silaannaap kissassusaa agguaqatigiissillugu allaat 4 gradinik qaffariarsinnaasoq, gassinillu silap pissusaanut ajoqutaasunik aniatitsineq 2050 nallertinnagu 85 procentimik minnerulersinneqartariaqartoq.