Naalagaaffiit Peqatigiit silap pissusaa pillugu isumaqatigiissutaanni arnat ataasinnguamilluunniit allaqqanngillat.
Tamanna nassuerutigineqarnikuuvoq taaneqarsimananili, taama oqarpoq nunanut inerisagassanut arnat ataatsimiititaliaanneersoq Marie Glinvad.
Sumiiffinni qarsutsiffiusuni arnat nalunneq ilinniarsimannginnamikku toqusarput, panernersuaqarfimmiittullu 15 kilometerit angullugit minguitsumik imertarlutik pisunnerusarput.
Taamaammat arnat pillugit suliniaqatigiiffiit arlallit decembarip qaammataani silap pissusaa pillugu ataatsimeersuarnissami arnat eqqartorneqarnissaat sorsuutigaat. Tamatumanilu ineriartornermut ministerip Ulla Tørnæsip tapersersorpai.
Isumaqatigiissummi maani Københavnimi akuerineqartussami taakku eqqaaneqarnissaasa qulakkeernissaat tamaviaarluta sulissutigaarput, tamanna pingaaruteqarluinnarmat.