Nord Stream 2 maannamut atorneqarsimanngisaannarpoq, Nord Stream 1-ilu matugallarneqarnikuulluni.Assi: Forsvaret/Ritzau Scanpix

CO2 aniasoq Danmarkip ukiumut aniatittagaata 32 procentiatut annertutigisoq

Ajornerpaamik pisoqassagaluarpat Nord Stream 1 aamma 2 CO2-mik 14,6 millionit tonsinik aniatitserataannaasut, Danmarkimi nukissiuuteqarnermut aqutsisoqarfik allappoq.

Gassit Østersømi aqqutaasa Nord Stream 1-ip 2-llu putuneqarnerisa kingorna CO2 aniatinneqartoq Danmarkip ukiumut aniatittagaata 32 procentiatut annertutigaaq.

Ajornerpaamik pisoqassagaluarpat Nord Stream 1 aamma 2 CO2-mik 14,6 millionit tonsinik aniatitserataannaapput, Danmarkimi nukissiuuteqarnermut aqutsisoqarfik taama allappoq. Danmarkimi naatsorsueqqissaartarfiup kisitsisaatai naapertorlugit Danmarkimi CO2-mik ukiumut aniatitsineq 44 millionit tonsiuvoq.

Nord Stream 1-ip 2-llu putuneqarnerisa silap pissusianut kingunipiloqarnerannut pissutaasoq tassaavoq ruujorit metangasimik ulikkaarmata. Metangas CO2-mut naleqqiullugu silap pissusianut sunniutipiloqarnerujussuuvoq.

AAMMA ATUARUK Danmarkip Rusland gassip aqqutaani qaartoqarnera pillugu oqaloqatiginngilaa

Danmarkimi nukissiuuteqarnermut aqutsisoqarfiup pisortaa Kristoffer Böttzauw taama nassuiaavoq, imalu nangilluni:

- Mingutsitsinerunngilarli, soorlu uuliakoortoqarneratut ittumik, uumassulinnut ulorianartumik.

- Avatangiisinut sunniuteqaatai killeqarput, taanna oqarpoq.

Ruujorit gassimik pilersuinermut atorneqartut maanna atorneqanngikkaluarput, gassimilli ulikkaarlutik. Ruujorit immap naqqaniitillutik gassimik ulikkaarput naqitsineqarniassammata.

Nord Stream 2 maannamut atorneqarsimanngisaannarpoq, Nord Stream 1-ilu matugallarneqarnikuulluni.

Gassit aqqutaasa piaaraluni putuneqarsimasut nukissiuuteqarnermut aqutsisoqarfiup attappaa, qaartinneqarlutillu putuneqarsimallutik, pisortap erseqqissaatigaa.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl