Clintonip Tantawi ataatsimeeqatigaa

Amerikami nunanut allanut tunngasunut ministeri Hillary Clinton, Igitsinimi sakkutuut siunnersuisoqatigiivinut siuttumik Hussein Tantawi-mik ullumi ataatsimeeqateqarpoq.
Allattoq Elisa Isaksen, Ritzau
juulip 15-at 2012 13:40

Ataatsimeeqatigiinnermi nalunaaquttap akunnera ataaseq sinnilaarlugu sivisussusilimmi pingaarnertut oqaluuserineqartut tassaapput, naalakkersuinikkut ineriartorneq aamma sakkutuut siunnersuisoqatigiivisa qullersaasa aamma islamit præsidentimut qinigaatitaata Mohammed Mursip akornanni akerleriissutaasinnaasut, Amerikamiut atorfilittaasa ilaat nutaarsiassaqartitsivimmut AFP-mut taama oqarpoq.

USA-p aningaasatigut ikiorsiisinnaanera ataatsimeeqatigiinnermi aamma oqaluuserineqarpoq.

- Tantawip erseqqissarpaa, aningaasarsiornikkut isumannaatsumik ingerlatsilluaqqilernissaq Igitsinip maannakkorpiaq pisariaqartinnerpaagaa, Clintonip atorfilittasa ilaat oqarpoq.

Hillary Clintonip ulluni marlunni tikeraarnermini, præsident Mursi imaluunniit sakkutuut siuttuat Tantawi ajuallatsinnaveersaarlugit mianersoqaluni tikeraartuuvoq.

Tantawip inatsisartut nutaat qinigaarlaat aasaleqqaarnerani atorunnaarsippai, Mursilu aatsaat juulimi akilluni inatsisartunut qinigaarlaat atuutileqqitsillugit, taassumami partia Det Muslimske Broderskab, inatsisartuni amerlanerussuteqarpoq.

Clintonip Mursi ippassaq ataatsimeeqatigaa, taassumalu Amerikamiut nunanut allanut tunngasunut ministeriata tikeraarnera nuannaarutigaa.

- Oqaloqatigiinneq, naaperiarfissarsiorneq aaqqiissutissarsiornerlu, inuinnaat naalakkersueqataaneranni pinngitsoorneqarsinnaanngillat, Clinton oqarpoq aamma Mursi-mik ataatsimeeqateqarnermi kingorna taanna isumalluartoq, nunat tamalaat tusagassiorfiinit oqaatigineqarpoq.