Clinton Savalimmiuni

Sverigimeersoq Hans Blix peqatigalugu Bill Clinton Nunat Avannarliit Illuanni Torshavnimi ualimut oqalugiassaaq.
Allattoq Elisa Isaksen
oktobarip 01-at 2007 11:52

Bill Clinton nalunaaquttap akunnialuisa matuma siornagut Savalimmiunut nunnippoq, tikeraarneralu persuarsiutigineqaqaaq.

Siornatigut præsidentiusimasoq Islandimiit timmisartumit attartukkamit Atlantic Airwaysimeersumit tikikkami qiimaqaluni koorpunik qarlilerluni timmisartumit niuvoq meeqqallu atuartut ussagarsimasut ilassillugit.

Savalimmiormiut 48.000-iinnarnik amerlassuseqartut tikeraarneq pisimasut pingaarnersaattut isigaat, timmisartorlu missimatsiaannartoq paasivaat Bill Clintonip qeqertaarannguit Atlantikup Avannaaniittut qangali ilisimasimagai.

- Savalimmiut soorunami siornatigut tusareernikuuakka. Uanga Irlandimiunik siuaasaqarpunga aamma Savalimmiormiut ilaatigut Irlandimiunik siuaasaqarput. Oqaluttuarisaaneq soqutigisaraara aamma nunat mikisut oqaatsiminnik attassiinnarsimasut soqutigisaraakka, Savalimmiormiut radiuannut Bill Clinton taama oqarpoq.

Bill Clinton Savalimmiuniit unnugu ingerlaqqissaaq. Tassa Københavnimut ingerlaqqissagami aqagulu Københavnimi oqalugiartussaavoq.