Clinton nutarterinisoqarnissaanik kajumissaarivoq
Igitsinimi sapaatit akunnerini kingullerni pisut tunngavigalugit taamatut kajumissaarivoq.
- Pissutsit allanngortinneqaratik ingerlaannarsinnaanngillat. Aamma allannguisoqarnissaa pinngitsoorneqarsinnaanngilaq. Hillary Clinton Kangiani Qiterlermi naalagaaffiit siuttuinut ullumi taama oqaaseqarpoq.
- Kangiani Qiterlermi siuttut innuttatik immaqa piffissami killilimmi tunuarsimaartissinnaavaat, taamatulli ingerlaannartoqarsinnaanngilaq, Clinton oqarpoq.
Isumannaallisaaneq pillugu Tysklandimi ataatsimeersuartoqarnerani Afrikap avannaani naalakkersuinikkut eqqissiviilliornerit oqallisigineqarneranni taama oqaaseqarpoq. Ataatsimeersuarnermi peqataapput Tysklandimi kansleri Angela Merkel aamma Tuluit ministeriunerat David Cameron. Igitsinimi, Tunesiami, Yemenimi Jordanimilu akerliussutsimik takutitsinerpassuit tunngavigalugit, inuinnaat naalakkersueqataanissaannik kissaatini Hillary Clintonip oqaatigaa.
Tamannaana pissutigalugu inuppassuit aqqusinermukaallutik isummaminnik ersersitsiniarsarisut, USA-p nunanut allanut ministeria oqarpoq. Clintonilu isumaqarpoq, akerliussutsimik takutitsisut piumasaat akuersaarneqarpata, naalakkersuinikkut eqqissiviilliorneq aatsaat minnerulersinneqarsinnaasoq.
- Siunissamik pitsaanerusumik eqqussigitsi, innuttaasut isumaat tusaaniarlugit, pisinnaatitaaffii ataqqillugit, pitsaanerusumillu inuuneqarnissamik kissaataat akueralugit, Hillary Clinton oqarpoq.
