Claus Nielsen: Sungiusaasut amerlanerusinnaagaluarput
Team Grønlandip ukiorpanni pisortarisimasaa Claus Nielsen Kalaallit Nunaanni Timersoqatigiiffiit Kattuffianni pisortassatut toqqarneqaqqammerpoq, aappaagulu januaarip aallaqqaataaniit sulilissalluni.
Nunatta OL-imut peqataatitaqarnissaanut piumasaqaatit piffissami kingullermi annikillisarneqarput, naallu tamanna nuannaarutigigaluarini, nunatsinni timersornerup silarsuaani pitsanngorsaasoqassappat sungiusaasoqarlunilu aqutsisoqarnissaa pingaaruteqartoq qulakkeerneqartariaqartorlu Claus Nielsenip oqaatigaa:
- Sungiusaasut aqutsisullu ikiliartuinnavimmata tamakku amerliartuinnartinneqarnissaat sulissutiginiarpara. Specialforbundit ataasiakkaarlugit oqaloqatigeqattaassavakka, neriuppungalu aasartinnagu tamanna naammassereersimassallugu, Claus Nielsen oqarpoq.
Kalaallit Nunaat OL-ernermi erfalasumi ataani ilaasinnaalernissaa ajornakusuussasoq, Claus Nielsenip oqaatigaa, sulilerunili misissugassanut ilaammat itinerusumik oqaaseqarusunngilaq, piffissarli apeqqutaaginnassaaq qanoq pisoqarumaassanersoq, Claus Nielsen oqarpoq.
Inuusuttut timersornermut saasarniarneqarnissaat pingaaruteqarluinnartoq Claus Nielsenip aamma oqaatigaa, taamaaliornikkut pinerluttaalisitsisoqarsinnaassammat.
Timersoqatigiiffiit kattuffianni ulloq maanna tikillugu pisortaasoq Jens Brinch timersoqatigiiffiit kattuffiannut ataannassaaq, nunanut allanut tunngasunut siunnersortitut atorfeqassagami.