Claus Jensenip tunuarnera Aleqap ajuusaarutigaa
Pisortaanerup soraarsitaaneratigut KNI-p qulliunerusutut atorfiit pingasut piffissap sivikitsup iluani inuttalerniartussaassavai. Aningaasaqarnermut pisortatut naatsorsuutinullu pisortatut atorfiit piffissap sivikitsup ingerlanerani aamma inuttalerneqartussaapput.
- Naalakkersuisut sinnerlugit annertuumik ajuusaarutigaara nunatsinni suliffeqarfiit pingaarnersaasa ilaat aqutsinikkut ilungersunartumik inissimmat. Qularutiginngilluinnarparali ingerlatseqatigiiffiup ingerlanneqarneranut pingaarnertut akisussaasuusussatut aggustimi siulersuisunut qinigaasut suliassamik
naammassinnissinnaasut, Hammond suliaq oqaluuserineqatsaaliorniarsaralugu taama oqarpoq.
Hammondip KNI-p ingerlanneqarnera oqaaseqarfigisinnaanngilaa, KNI-lli siulersuisui Naalakkersuisut siulittaasuata nammineq toqqarsimasani, siulersuisullu siuliinit iluarinerusani, isumalluarfigai.
- Suleriaatsinik aaqqissuussaanermillu pitsanngorsaanissaq, aammalu nunatsinni suliffeqarfiit annersaasa pingaarnersaasalu ilaanni patajaallisaanissaq
siunertarerpiarlugu taakku toqqarneqarput. Taamaattumik siulersuisutut pikkorilluinnartutut toqqagaasimasut taakku pisoq iliuuseqarfigissagaat Naalakkersuisut
tatigilluinnarpaat, Aleqa Hammond oqarpoq.