Claus Jensen KNI-mut akisusimaqaaq
Claus Jensenip KNI-mi pisortaanertut atorfininneraniit KNI qanoq ingerlasimanersoq eqqartuussissuserisup Niels Hansen Dammip aamma naatsorsuuserisarfiup Deloittep allaaseraat.
Eqqartuussissuserisoq Niels Hansen Damm inatsisitigut naliliinermini ilaatigut ima allaaserinnippoq:
Issuaaneq aallartippoq: "Uanga Claus Jensenip soraarsitaanera nalilissagukku, soraarsitaanera pissutissaqarluarpoq" Issuaaneq naavoq.
Eqqartuussissuserisoq isumaqarpoq, Claus Jensen arlaleriarluni suliffeqarfiup aningaasaatai imminut iluaqutissanngorlugit atortarsimagai.
Ilaatigut eqqartuussissuserisup ttaakartugai - ilaatigut Sisimiuni nuannannerujussuaq - aliikkusersuiartortunik Danmarkimiit Sisimiunut tikisitsisoqarluni. Ilaatigullu Claus Jensenip ilaquttani KNI-p akiligaanik Sisimiunut tikisissimavai nuannannissamut ikiortissatut sulisussarsiaralugit.
Ikiortit nuannannermi - nerriviliortussat, assiliisussat allallu 33.615 koruuninik akeqarsimapput.
KNI-p akiligaanik angalanerit tamaanga killeqanngillat. Claus Jensenip nuliani minnerpaamik arfinileriarluni Sisimiuniit - Københavnimut siumut utimullu angalatittarsimavaa.
Claus Jensenillu KNI-mut isumaqatigiissutaani allaqqalluni sulinngiffeqarnermut atatillugu suliffeqarfiup akiligaanik ukiumut marloriarluni angalasinnaasoq.
KNI-mi siulersuisuni siulittaasoq Niels Thomsenip nalunaarusiat saqqummiutissallugit aalajangersimavoq, isumaqarami saqqummiunneqarnissaanut piffissanngortoq.
- Suliaq killormut saatinneqarsimavoq. Uanga isumaqarpunga Kalaallit aamma danskit tusagassiutaanut saqqummiuttariaqarlugit. Ajortutut inissitaasimanerput immaqa muminganeertuusoq takutinniarlugu. Soraarsitaaneranut tunngavissat isiginngitsuusaarneqarsinnaanngimmata, Niels Thomsen Danmarkimi aviisimut Politikkenimut oqarpoq.
Claus Jensen Radioaviisimit pissarsiariniaraluaratsigu iluatsinngilarput.