Cirkus KNI ingerlaqqippoq

Arnaq, kinaassutsiminik saqqummiusserusunngitsoq. januaarip arfineq-pingajuani KNI-mi sulileqqittussaagaluarpoq, pisortaqatigiilli sulisunit tatineqarnermikkut atorfinitseqqinneqarnissaa taamaatiinnartariaqarsimavaat. KNI-lli pisortaanerigallagaata taamaattoqarnera ilumuunnginnerarpaa.

Arnaq taana, kinaasusia KNR-imi ilsimasarput, siulersuisut siulittaasuannut Niels Thomsenimut naalakkersuisullu siulittaasuannut Aleqa Hammondimut sulisut naammagittaalliuuteqarlutik allagaqaataannut atsioqataarusussimanngitsut ilagaat. Taamatut iliuuseqartoqarnera arnap taassuma isumaqataaffiginagu oqaatigisimavaa, taamaalioramilu allagaqaammik nassitsisunit tatigisaajunnaarpoq, tusarfiit arlallit Radioaviisimut taama oqaluttuarput.

Sulisut allagaqaammut atsioqataanngitsut kingorna suleqatiminnit malersorneqalerput arnarlu novembarip qaammataata qiteqqunnerani KNI-mi business controlleritut atorfimminit tunuarpoq.

Aningaasaqarnermulli pisortaanerugallartutut atorfinitsinneqartup Jan H. Lynge-Pedersenip arnaq atorfimminut uteqqusimavaa pingasunngornermi januaarip arfineq-pingajuani atorfimminut uternissaanik neqeroorfigalugu.

Atorfineqqinnissanili ullormik ataatsimik sioqqullugu, marlunngornermi unnukkut, Jan H. Lynge-Pedersenimit sianerfigineqarsimavoq oqarfigineqarluni, ajoraluartumik atorfimminut uteqqissinnaanngitsoq.

Lyng-Pedersen pisortaanerugallartumit Peter Grønvold Samuelsenimit attavigineqarsimavoq, taamatullu naalakkerneqarluni. Peter Grønvold Samuelsen sulisunit 14-init, allagaqaateqartuusunit attavigineqarsimavoq. Arnaqo allaffeqarfimmut uteqqinnissaa kissaatiginngilaat, taamatullu kissaateqartoqarnera pisortaanerugallartup akuerisimavaa.

Arnarli angerlarsimaffimminit sulisinnaaneranik neqeroorfigineqarsimavoq, tamannali naaggaarsimallugu.

Radioaviisimit arnaq taanna oqaloqatigaarput. Suliaq oqaaseqarfigerusunngilaa oqaluttuarineqartorli ilumoornerarlugu.

Radioaviisip aamma pisortaanerugallartoq Peter Grønvold Samuelsen attaveqarfigisimavaa, taassumali taamaattoqarnera ilumuunnginnerarpaa oqaaseqaqqikkumananilu.

Pisortaanerugallartoq aningaasaqarnermut pisortamut innersuussivoq, Lynge-Pedersenili oqaaseqartinniarlugu attaveqarfigisinnaasimanngilarput.