Cimberimut ilaasut nassatatik namminneq isumagisalerpaat
Air Greenlandimut ilaallutik Nunatsinnut Nunatsinnillu angalasut, Qallunaat Nunaanni Cimber Sterlingimit angallanneqartartut, aallalernermiit apuuffissamut nassataminnik isumagineqartarnerat, ajuusaarnaraluartumik suleqatigiissutaajunnaarpoq. Air Greenland tusagassiuutinut ullumi taama nalunaarpoq.
Nassatanik apuuffissamut ingerlaannartitsisarneq pillugu Air Greenlandip Cimber Sterlingimik ukiup affaata matuma siorna isumaqatigiissuteqarneratigut, ilaasut Københavnip timmisartunut mittarfiani nassatat namminneq isumaginagit, timmisartumut ikinissamut uppernarsaammik nutaamik, tikittut aallartussallu saaffiginnittarfianni aalliinnartarput.
Cimber Sterlingip qarasaasiakkut sullississutiminik allannguineratigut nassatanut tunngatillugu sullissisinnaajunnaarneq pivoq.
Air Greenlandip ilaasussai, Qallunaat Nunaanni Cimber Sterlingimit angallassassat, namminneq nassataminnik aalleriarlutik ilaaffissap tullianut tunniussiartortariaqalernerannik tamanna kinguneqarpoq.
Air Greenlandimut pisattanik tunniussineq aallarfissatut pilersaarutaasoq kingusinnerpaamik minutsinik 45-nik sioqqullugu naammassereerneqassaaq. Ikiartornissamut piareersarneq tamatuma nalaani aamma pisarmat - Air Greenlandimit angallanneqarnermut tapiliullugu timmisartortitseqatigiinnit allanit angallanneqarnissaq ilanngullugu - inniminniinermi pisattanik tunniussinermiit aallarnissap, sivikinnerpaamik nalunaaquttap akunneranik ataatsimik sivisussuseqarnissaa, Air Greenlandip naatsorsuutigeqquaa.
Københavnip timmisartunut mittarfiata aasaanerani ulapaarfioqimmat, sillimaniarneq pissutigalugu misissortinnissamut siuleriiaarlutik utaqqisut amerlanerusarnerat, Air Greenlandip ilaasussaminnut eqqaamaqquaattaaq.
Nassatanut tunngatillugu Qallunaat Nunaanni timmisartuussinermi Air Greenlandip SAS-imik suleqateqarnera allannguuteqanngilaq, SAS aallalernermiit apuuffissamut nassatannik isumaginnissammat.
