Cimber Sterling amigartoorujussuarpoq
Cimber Sterlingip 2009/2010-mut ukiumoortumik naatsorsuusiai marlunngormat saqqummiunneqarsimatsiartullu, piginneqataassutit nalingi 10 procentimik appariataarput. Cimber Sterlingip amigartoorutai 200 millionit koruuningajalluinnaapput. Nutaarsiassaqartitsivimmi Ritzauimi tamanna ilisimatitsissutigineqarpoq.
Cimber Sterlingimi pisortaaneq, Jakob Krogsgaard, oqarpoq, ilimagisamit ilaasukinnerusimanera amigartoorujussuarnermut pissutaasoq, aamma Islandimi qaqqap innermik anitsisup teqqalatitai pissutaallutik timmisartussinerup uninngasimanerujussua timmisartuutileqatigiiffimmut akisoorujussuusimasoq.
Aningaasaqarnerup siumut aallaqqinnissaa anguniarlugu naalagaaffiup iluani timmisartuussinerit amerliniarneqarput, taavalu Københavnimiit Tel Avivimut aqqummik toqqaannartumik ammaanissaq aamma anguniarneqarluni.
Kangerlussuup Aalborgillu akornanni timmisartuussisalernermik ammaanissaq Cimber Sterlingip siusinnerusukkut pilersaarutigigaluarpaa. Eqqarsaatersuutilli taakku timmisartuutileqatigiiffiup aningaasaqarnerata siumut aallaqqinnissaanik pilersaarutini taaneqanngillat.
Aktiat nalingi pingasunngormat appariarujussuarmata piginneqataasoq Karsten Ree Cimberip aktiaataanik 4,1 millionit koruunit nalinginut timmisartuutileqatigiiffimmik piginnittut ilaqutaanit pisivoq. Sønderjyllandimi akikitsumik timmisartuussisartup aktiaataanit 13,75 procentit pigilerpai.
