Cimber politiinut suliasssanngortinneqalerunarpoq

Norwegianip timmisartuutaa januaarimi qangattartussanngormat ilaasussallu 118-it takkutinngimmata, pisoq Norwegianimit misissuiffigineqalerpoq. Taamaalilluni paasineqarpoq, Cimber Sterlingimi sulisut inniminniisuusaaqattaarnernut pisuusut, Ritzau taama allaaserinnippoq.

Maanna Norgimi radiup nittartagaani allaaserineqarpoq, Cimber Sterlingimi atorfillit pingasut, Norwegianimut inniminniisimasut, Norwegian Qarasaasialerinermik nakkutilliisoqarfimmut naammagittaalliutigisimagaat, maannalu inatsisilerituumik ikiortilerlutik politiinut suliassanngortitsinissaminnik qunusaaarilerput. Taakkua isumaqarput, Norwegianimit tusagassiorfinnut nalunaarutigineqarnertik inatsisinik unioqqutitsinerusoq. Tassami Norwegianip taamaallaat kikkut bilitsisisimanerat paasisinnaammagu, akiliisimanermut uppernarsaatini paasissutissat najoqqutaralugit.

Norwegianimi attaveqaqatigiinnermut pisortap Anne-Sissel Skånvikip Norgimi radiup nittartagaanut oqaatigaa, Qarasaasialerinermik nakkutilliisoqarfimmut naammagittaalliuuteqarneq ingasaallugu ileqqorlunnermut takussutissaasoq.

- Siullermik akikilliliilluta neqerooruterput sequmippaat, tamatumalu tamanut saqqummiunneqarnera maanna naammagittaaliuutigilerpaat, Anne-Sissel Skånvik oqarpoq.

Marsip aqqaneq-aappaat nallertinnagu Norwegianip pisimasumut nalunaarusiani Qarasaasialerinermik nakkutilliisoqarfimmut tunniuttussaavaa.