Cigaretsit akisuut

Amerikami naalagaaffiit ilaanni New Hampshire-mi 23-nik ukiulik Josh Muszinski cigaretsinik pisereernermi kingorna tupaallarujussuarpoq.
Allattoq Jokum Nielsen
juulip 16-at 2009 17:11

Pisereernermi kingorna kontoni takullugu paasivaa, 121 millioni milliardinik dollarsinik ilanngaatsissimalluni, tassa nul-unik 15-inik amerlassusilinnik.

- Isumaqaraluarpunga kontora atornerlunneqarsimasoq, kredit korteralu atorlugu arlaat Europa tamakkerlugu tigusisimasoq, angut tupaallaqqaqisoq illoqarfiup tv-qarfianut WMUR-imut oqaluttuarpoq.

Josh Muszinskili kisimi kontominik USA-p naalagaaffiata akiitsuinik angitigisumik ilanngaatsissimanngilaq. Inuimmi pingasut: ataaseq kinaassutsiminik isertuussisoq, angut Memphisimeersoq, ataaserlu Texasimeersoq aamma taamatorluinnaq kontominnik ilanngaatsissimapput. Kukkunerli iluarsineqareersoq, Josh Muszinskillu 80 koruunit aningaaserivimmiit tigoreersimagai, oqaatigineqarpoq.