CIAp timmisartuutai pillugit nunat allat pillugit ataatsimiititaliaq ataatsimiippoq

Ataatsimiititaliap maluginiagai pillugit siulittaasuat Atassummeersoq Knud Kristiansen ima nassuiaavoq.

- Nalunaarusiaq annertulaartutut taasariaqarpoq 100-t sinnerlugit qupperneqarpoq, ataatsimiititaliamilu immikkut maluginiagarput aana: Tigusanik ilaasoqarluni nunarput qulaallugu timmisartuussisoqartarsimanersoq uppernarsarneqanngimmat, tassa aappeerneqanngilaq aamma naameerneqanngilaq, Knud Kristiansen oqarpoq.

-Tamannami qanoq isummerfigaasiuk?

- Soorunami ajuusaarnarpoq, pingaartissimagaluarparpummi arlaannik akissummik takussutissiisoqarsimassasoq. Iluarisimaagarpulli aana naalakkersuisuusimasup Aleqa Hammondip ukioq manna februaarimi aalajangernikuummat nunatsinnut mittut tamarmik nalunaarusiorneqartalissasut. Taamatuttaaq nakkutilliisut pisinnaatinneqartassasut nassatanik misissuisarnissaannik, taannalu iluarisimaarparput, oqarpoq.

Inatsisartut Nunanut allanut illersornissarlu pillugu ataatsimiititaliaata isumaqatigiissutigaa paasineqassagaluarpat ilumut innarliisoqarsimasoq taava piumasarigitsik, iliuusissat pisariaqartut arlallit danskinit iliuuserineqassasut. Soorlu uani ilaatigut taaneqarsinnaavoq Chicagomut isumaqatigiissut naapertorlugu USA-miut erseqqissaavigineqassasut Kalaallit Nunaata Savalimmiullu silaannaatigut timmisartumik ingerlatsisoqassappat taava tamanna aatsaat pisinnaassasoq sioqqutsilluni danskit oqartussaasuinut akuersissummik peqqaarsimanissaq, Knud Kristiansen ilaatigut taama oqarpoq.

-Nutaamik misissuisoqarnissaanik piumasaqalersaanngilasii?

-Amerlanerussuteqarluta piumasaqalersaanngilagut, tassami nalunaarusiami uani takuneqarsinnaasumi ilimaginngilarput USA-miit nutaarsiassanik allanik pineqartumut attuumassuteqarsinnaasunik pisoqarsinnaanissaa,

taama oqarpoq Knud Kristiansen. Taanna aamma oqarpoq timmisartut tigusanik ilaasullit Kalaallit Nunaannut aqqusaartarsimassappata taava tamanna piumasarineqassasoq inuit pisinnaatitaaffiisa ataqqineqarnissaat.