CIAp misissuiffiginissaa tapersersuinnalerpaat
SF-imi, Socialdemokratini Radikalinilu siulittaasut nunanut allanut politikkertik aviisimi Politikenimi ippassaq saqqummiuppaat, Villy Søvndalilu sumulluunniit attuumassuteqanngitsunit misissuinissaq sooq aallartinneqarsimanngitsoq toqqarluni aperineqarami, ima oqarpoq.
- Killilimmik misissuisoqarnissaa soorunami kissaatigisimavarput. Kisianni isumaqarpunga tulleriiaarisariaqartugut. Uagut isumaqarpugut, soorlu Irakimi sorsunnermi naalakkersuisut kukkorujussuarsimasut, Villy Søvndal oqarpoq.
Villy Søvndal taama oqarmat partiit marluk siulittaasuisa naqqinngilaat. Naak CIA-p parnaarussanik Danmarkip Kalaallit Nunaatalu silannartaatigut timmisartuussisarneragaanera pillugu sumulluunniit attuumassuteqanngitsunit misissuisoqarnissaa saamerliuniat arlaleriarlutik piumasarisarsimagaluaraat.
Socialdemokratilli nunanut allanut tunngassuteqartunut oqaaseqartartua, Jeppe Kofoed, ullumikkut oqarpoq, tamanna paatsoornerusoq. Partiit taakku pingasut suleqatigiissitaliorniarput, Danmarkip Irakimi sorsuttoqarnerani peqataasimaneranik misissuisussanik - tassanilu CIA-p timmisartuussisarnera aamma misissorneqassaaq.
Nunanut allanut tunngassuteqartunut maanna ministerip, Lene Espersenip, saamerliuniat isornarnartorsiupallappai:
- Ulloq ataaseq allatut oqarunik, ullup aappassaani allatut iliussapput, suna upperissavarput?, Lene Espersen aviisimut Politikenimut oqarpoq.
Kalaallit Folketingimut qinigassanngortittut ippassaq oqarput, qinigassagaluarunik sumulluunniit attuumassuteqanngitsumik misissuisoqarnissaa piumasariniaritsik. Atassummilli qinigassanngortittut tamanna iluaqutaassangatinngilaat.
