CIA pillugu nalunaarut nutaaq piariilerpoq
Nalunaarusiaq naammassineqartoq Nunanut allanut tunngasunik Danmarkimi ilisimatusarfik nalunaarpoq. Nalunaarusiaq kalaallisut nutserneqareerpat tamanut saqqummiunneqassaaq.
Tamannalu sapaatip akunnerata tulliani imaluunniit tulliata tulliani saqqummiunneqarumaartoq naatsorsuutigineqarpoq.
Amerikamiut isertortumik paasiniaasartui unioqqutitsillutik Kalaallit Nunaata silaannartaatigut timmisartuussisarsimanerat 2007-imi saqqummiunneqarmalli, arlaannaannulluunnit attuumassuteqanngitsunit misissuiffigineqarnissaa kalaallinit ujartorneqarpoq.
Timmisartut tigusanik ilaasoqarlutik Narsarsuarmut Kangerlussuarmullu aqqusaartarsimanersut kalaallinit paaserusunneqarpoq. Nunanut allanut tunngasunik Danmarkimi ilisimatusarfimmit siusinnerusukkut qulakkeerlugu oqaatigineqarpoq, tamanna pillugu amerikamiunit akissuteqartoqarnissaa naatsorsuutigineqassanngitsoq.
Taamaattorli danskit naalakkersuisorisimasaat pisumut attuumassuteqarsimanersut saqqummiunneqassasoq Nunanut allanut tunngasunik Danmarkimi ilisimatusarfik ilisimatitsivoq.
Atorfilittat nalunaarusiaanni 2008-mi saqqummiunneqartumi qulakkeerlugu oqaatigineqarpoq, timmisartut tigusanik ilaasoqarsimanerat pillugu amerikamiut oqaaseqarnianngitsut aamma paasissutissiinianngitsut.
